ਡੀਜ਼ਲ ਦੇ ਰੇਟ ਘੱਟ ਗਏ ਪਰ ਬੱਸਾਂ ਦਾ ਕਿਰਾਇਆ ਕਿਉਂ ਨਹੀਂ ਘਟਿਆ ?

ਸੁਖਨੈਬ ਸਿੰਘ ਸਿੱਧੂ
ਕੌਮਾਂਤਰੀ ਮੰਡੀ ਵਿਚ ਤੇਲ ਦੀਆਂ ਕੀਮਤਾਂ ਵਿਚ ਭਾਰੀ ਗਿਰਾਵਟ ਆਉਣ ਨਾਲ ਕੇਂਦਰ ਸਰਕਾਰ ਨੇ ਡੀਜ਼ਲ ਦੇ ਰੇਟ ਵਿਚ ਦੋ ਵਾਰ ਦੋ- ਦੋ ਰੁਪਏ ਪ੍ਰਤੀ ਲੀਟਰ ਕਮੀ ਕੀਤੀ ਹੈ । ਇਸ ਤਰ੍ਹਾਂ ਡੀਜ਼ਲ ਦੀ ਕੀਮਤ ਵਿਚ ਹੁਣ ਚਾਰ ਰੁਪਏ ਪ੍ਰਤੀ ਲੀਟਰ ਦੀ ਕਟੌਤੀ ਹੋ ਗਈ ਹੈ। ਪ੍ਰੰਤੂ ਬੱਸ ਕਿਰਾਇਆ ਹਾਲੇ ਵੀ ਉਸੇ ਤਰ੍ਹਾਂ ਵਸੂਲਿਆ ਜਾ ਰਿਹਾ ਹੈ। ਪੰਜਾਬ ਦੀ ਸਰਕਾਰ ਚਲਾ ਰਹੇ ਅਕਾਲੀ- ਭਾਜਪਾ ਗੱਠਜੋੜ ਦੇ ਸਾਰੇ ਸਿਰਕੱਢ ਨੇਤਾਵਾਂ ਨੇ ਤੇਲ ਦੀਆਂ ਕੀਮਤਾਂ ਵਿਚ ਕਮੀ ਕਰਨ ਦੀ ਵਕਾਲਤ ਕੀਤੀ ਸੀ ।
ਪਰ ਹੁਣ ਜਦੋਂ ਤੇਲ ਦੀ ਕੀਮਤਾਂ ਵਿਚ ਕਮੀ ਹੋ ਗਈ ਹੈ ਤਾਂ ਇਨ੍ਹਾਂ ਲੀਡਰਾਂ ਨੂੰ ਬੱਸਾਂ ਦੇ ਕਿਰਾਏ ਘਟਾਉਣ ਦਾ ਖਿਆਲ ਕਿਉਂ ਨਹੀਂ ਆਇਆ ? ਸੱਤਾਧਾਰੀ ਅਤੇ ਵਿਰੋਧੀ ਧਿਰ ਦੇ ਕਿਸੇ ਆਗੂ ਨੇ ਬੱਸ ਕਿਰਾਏ ਵਿੱਚ ਕਮੀ ਕਰਨ ਲਈ ਨਹੀਂ ਆਖਿਆ ।
ਅਕਾਲੀ ਅਤੇ ਭਾਜਪਾ ਦੇ ਆਗੂ ਤਾਂ ਸ਼ਾਇਦ ਇਸ ਕਰਕੇ ਚੁੱਪ ਹਨ ਕਿ ਇਸ ਵੇਲੇ ਚੱਲ ਰਹੀਆਂ ਬੱਸਾਂ ਵਿੱਚ ਸਭ ਤੋਂ ਵੱਡੀ ਫਲੀਟ ਬਾਦਲ ਪਰਿਵਾਰ ਦੀ ਹੈ । ਇਸ ਲਈ ਕਿਰਾਇਆ ਘਟਾਉਣ ਦੀ ਗੱਲ ਕਰਨੀ ਵੀ ਬਾਦਲ ਪਰਿਵਾਰ ਨਾਲ ਨਰਾਜ਼ਗੀ ਸਹੇੜਣ ਵਾਲਾ ਕੰਮ ਹੈ । ਇਸ ਲਈ ਸੱਤਾਧਾਰੀ ਧਿਰ ਦਾ ਕੋਈ ਆਗੂ ਅਜਿਹੀ ਜੁਰੱਅਤ ਨਹੀਂ ਕਰ ਸਕਦਾ । ਫਿਰ ਵਿਰੋਧੀ ਧਿਰ ਕਾਂਗਰਸ ਦੇ ਆਗੂਆਂ ਨੇ ਮੂੰਹ ਵਿਚ ਕਿਉਂ ਘੁੰਗਣੀਆਂ ਪਾਈਆਂ ਹੋਈਆਂ ਹਨ ? ਫਿਰ ਆਮ ਆਦਮੀ ਦੇ ਹੱਕਾਂ ਵਾਸਤੇ ਆਵਾਜ਼ ਕੌਣ ਉਠਾਏਗਾ ?
ਭਾਜਪਾ ਦੇ ਸੀਨੀਅਰ ਅਤੇ ਬੇਖੌਫ਼ ਆਗੂ ਸੁਖਮਿੰਦਰ ਪਾਲ ਸਿੰਘ ਗਰੇਵਾਲ ਆਪਣੀ ਆਵਾਜ਼ ਜਨਤਾ ਦੇ ਹੱਕ ਬੁਲੰਦ ਕਰਦੇ ਹੋਏ ਬੱਸ ਕਿਰਾਇਆ ਤੁਰੰਤ ਘੱਟ ਕਰਨ ਦੀ ਮੰਗ ਕਰਦੇ ਹੋਏ ਆਖਦੇ ਹਨ ਕਿ ਬਾਦਲ ਪਰਿਵਾਰ ਨੂੰ ਰਾਜ ਨਹੀਂ ਸੇਵਾ ਵਾਲੇ ਵਾਅਦੇ ਨੂੰ ਅਮਲੀ ਰੂਪ ਦੇਣਾ ਚਾਹੀਦਾ ।